unused stocks, with some page discoloration
148 pages

Pagbabalik sa Bondoc Peninsula ang etnograpikong nobelang ito na titindigan ng pangunahing tauhan na si Siglo. Si Siglo na mamumulat sa lipunan ng lahing uwak, bayawak at aswang na kalauna’y sasakmalin ng mga hunghang na buwaya—mga
Kastila na napadpad sa baybayin ng Sibuyan Sea sa pinakapaanan ng Bondoc Peninsula. Ang pag-ungkat sa ugat ng kanyang angkan bilang apo ng bayawak at ang pagsisikap na makibahagi sa suliranin ng mga magkokopra ang binaybay at inilatag sa nobela. Ang diskurso ng mga tauhan ay pagkalkal at pagsubaybay sa bukal ng Bondoc Peninsula bilang lipunan, nakapaloob dito ang angkan, lahi, uri, gawi, lupa at kabuhayan. Gayundin ang tangkang pagbalik sa mga kuwentong bayan, alamat, kalinangan at kulturang magiging daan sa malalim na pagkilatis sa kabihasnang niluma ng panahon. Narito rin sa nobela ang kakaibang konsepto ng pagluwas at pag-uwi, pag-alis at pagbalik sa kakaibang lugar na lungga ng mga niyog. Ang kabilaang talaban ng probinsiya at siyudad sa mata ni Siglo na kaga-graduate pa lamang ng high school. Isang batang lumuwas at makatutuklas sa lente ng buhay mulang Bondoc Peninsula patungong Maynila at mulang Maynila pabalik ng Bondoc Peninsula.